وبلىستىق ءبىلىم باسقارماسىنىڭ مالىمەتىنشە, 20 قاراشادان باستاپ قوستاناي, رۋدنىي قالالارى مەن التىنسارين, قوستاناي اۋداندارىندا 29 مەكتەپتىڭ جەكەلەگەن سىنىپتارى دا قاشىقتان وقي باستاعان.
بۇگىندە وڭىردە 5 634 وقۋشى قاشىقتان ءبىلىم الىپ جاتىر. ونىڭ 2 274-ءى – 1-4 سىنىپتا, 3360-ى 5-11 سىنىپتا وقيدى.
ءبىلىم وردالارىندا جۇقپالى ۆيرۋستىڭ تارالىپ كەتۋىنە اتا-انالار دا الاڭداۋلى. ءبىراز اتا-انا مۇنداي جاعدايدا وقۋ مەكەمەلەرىنىڭ تولىقتاي قاشىقتان وقۋ رەجىمىنە كوشكەنىن دۇرىس كورەدى. ال وبلىستىق ءبىلىم باسقارماسى باسشىسىنىڭ ورىنباسارى داناگۇل سۇيىندىكوۆا مەكتەپتەردىڭ تولىقتاي قاشىقتان وقىتۋ تارتىبىنە كوشۋى باس سانيتارلىق دارىگەردىڭ قاۋلىسىمەن عانا قابىلداناتىن شەشىم ەكەنىن ايتادى.
سانەپيدباقىلاۋ دەپارتامەنتىنىڭ مالىمەتىنشە, 1 قازان مەن 18 قاراشا ارالىعىندا وڭىردە جرۆي جۇقتىرعان 36 مىڭنان اسا ادام تىركەلگەن. ونىڭ 21 مىڭى – 14 جاسقا دەيىنگى بالالار.
وڭىردە تۇماۋدىڭ ءورشىپ بارا جاتقانىنا بايلانىستى وبلىستىق بالالار اۋرۋحاناسى دا كۇشەيتىلگەن جۇمىس تارتىبىنە كوشتى. ەمدەۋ مەكەمەسى ناۋقاستاردىڭ سىرتقا شىعۋىنا, ولاردىڭ اتا-انالارى مەن تۋىستارىنىڭ عيماراتقا كىرۋىنە تىيىم سالدى.
